Svæðið okkar

Neskaupstaður er austasti bær á Íslandi. Íbúar eru rúmlega 1500. Mikil skógrækt er fyrir ofan bæinn og þar eru athyglisverðir snjóflóðavarnargarðar. Margar skemmtilegar gönguleiðir eru auk þess í nágrenni bæjarins. Á Neskaupstað er góð sundlaug og nokkrir veitingastaðir auk verslana. Þar eru einnig söfn sem vert er að skoða; náttúrugripasafn, sjóminjasafn og safn Tryggva Ólafssonar. Innúr Norðfjarðarflóa ganga fjórir firðir; Mjóifjörður, Norðfjörður, Hellisfjörður og Viðfjörður. Landslagið er stórbrotið og sigling á Norðfjarðarflóa er einstök upplifun. Þar gefur að líta fjölbreytt fuglalíf, smáhveli og einstakt landslag. Norðfjarðarhornið og Nípan kallast á og í fjarska sér yfir til Dalatanga. Einnig er skemmtilegt að renna fyrir fisk á Norðfjarðarflóa.
Allar brottfarir eru frá bryggjunni neðan við Egilsbúð.

Mjóifjörður er fullur af friðsæld og fegurð. Góður staður til að njóta náttúrunnar við lækjarnið og sjávarilm í faðmi fjallanna. Veitingasala yfir sumartímann; nýr mjófirskur kræklingur og súpa með heimabökuðu brauði, kaffi, kakó og nýbakaðar vöfflur með sultu og rjóma. Bændagisting bæði í Sólbrekku og tveimur heilsárs bústöðum, opið allt árið. Upplifið ekta óvissuferð í Mjóafirði. Nánari uppl. veitir Jóhanna í s. 4760007 eða 8949014.

Tilvalið er að sigla með fyrri ferðinni til Mjóafjarðar á föstudegi eða mánudegi og dvelja þar yfir daginn og sigla svo með seinni ferðinni til baka eða dvelja í Mjóafirði frá föstudegi til mánudags og upplifa einstaka nátturu og friðsæld, fara í gönguferðir og njóta margvíslegrar þjónustu sem í boði er.